Camau Creadigol i Sefydliadau

Mae’r gronfa’n cefnogi datblygu sefydliadol a/neu fusnes sefydliadau celfyddydol dan arweiniad pobl fyddar, anabl, niwroamrywiol neu ethnig a diwylliannol amrywiol. Mae'r cynllun yn canolbwyntio ar sefydliadau dan arweiniad y grwpiau yma oherwydd bod ymchwil fewnol ac allanol wedi dangos nad ydym yn cysylltu â nhw’n ddigonol. Mae ganddynt anawsterau wrth gael ein harian ac yn wynebu rhwystrau a gwahaniaethu.

Rydym yn diffinio 'dan arweiniad' i olygu bod o leiaf 51% o uwch reolwyr, pwyllgor rheoli, bwrdd, corff llywodraethu neu gyngor eich sefydliad yn aelodau o un o'r grwpiau yma.

Agorwch y gwymplen nesaf i weld ein diffiniadau llawn.

Dylech ddarllen y meini prawf isod i gael gwybod a ydych yn gymwys i ymgeisio: Cymhwysedd - Sefydliadau

Rhaid bod eich sefydliad yn cyflwyno gweithgarwch celfyddydol i gyfranogwyr a chynulleidfa. Efallai y byddwn hefyd yn ystyried ceisiadau gan sefydliadau sy'n dymuno cyflwyno gweithgarwch celfyddydol i bobl. Efallai y byddwn yn penderfynu eich ariannu ar sail posibiliadau eich sefydliad. Rydym yn awyddus i gefnogi sefydliadau sydd â gweledigaeth greadigol gref sy'n dangos y potensial i wneud sector y celfyddydau’n fwy amrywiol. 

Rhaid bod eich sefydliad yng Nghymru. 

Mae'n rhaid ichi ddisgrifio’r rhwystrau ar daith eich sefydliad a sut mae arian Camau Creadigol yn gallu eu goresgyn. Rydym yn gwybod pa mor anodd weithiau yw siarad am brofiadau cas, felly byddwn yn gwneud ein gorau i greu lle diogel i wneud hyn. 

Rydym yn diffinio ‘ethnig ac yn ddiwylliannol amrywiol’ yn:

• unrhyw un ar wasgar o'r gwledydd yma: Affrica, Asia, y Caribï, Sbaen, Dwyrain Ewrop neu'r Dwyrain Canol neu sy’n Lladinaidd
• unrhyw un sy'n dod o grŵp ethnig nad yw'n wyn yn unig
• unrhyw un o gymunedau Sipsiwn, Roma a Theithwyr
   

 Rydym yn diffinio ‘anabledd’ yn ôl y Model Cymdeithasol o Anabledd sy’n:

• fframwaith gan bobl anabl i weithredu yn erbyn eu gormes. Mae'n datgan bod pobl yn cael eu hanablu gan rwystrau yn y gymdeithas ac nid o reidrwydd oherwydd eu nam. Mae rhwystrau’n gallu bod yn rhai corfforol (diffyg toiledau anabl) neu rai sy’n dod o agweddau (cymryd nad yw pobl anabl yn gwneud rhai pethau)
• gwrthwynebu'r model meddygol o anabledd a oedd yn dweud bod pobl anabl yn broblem feddygol i'w datrys neu eu gwella

Rydym yn diffinio ‘niwroamrywiol’ yn:

• ystyried gwahaniaethau datblygiad yr ymennydd yn amrywiad naturiol yn y ddynoliaeth gan ein hannog i ymwrthod ag agweddau beirniadol am bobl sy’n dysgu mewn ffordd arall neu’n gweld pethau mewn ffordd wahanol 

• mae gan bob un ohonom systemau nerfol unigryw o alluoedd ac anghenion
• rydym yn gwybod nad oes un ffordd ‘gywir’ o feddwl, dysgu ac ymddwyn a rhaid dathlu'r gwahaniaethau yn hytrach na’u hystyried yn ddiffygion

Nod y gronfa yw cefnogi eich datblygiad sefydliadol a/neu fusnes. Nid yw'n ariannu gwaith artistig. Rydym am i sefydliadau nodi'n union beth sydd ei angen arnynt i gryfhau a datblygu eu sefydliad gan aros yn agored i archwilio gwahanol ffyrdd o wneud hyn gyda ni. 

Rydym yn gwybod bod anghenion pob sefydliad yn wahanol a bod datblygu sefydliadol neu fusnes yn amrywio o sefydliad i sefydliad. Ond dyma rai o'r pethau posibl i’w cynnwys yn eich cais:

• gweithio gyda rhywun sydd â phrofiad tebyg i’ch sefydliad i ystyried pa gamau i’w cymryd nesaf os nad ydych yn siŵr (dysgu gan eraill)

• cyrsiau hyfforddi sy'n gysylltiedig â datblygu eich sefydliad neu fusnes (ond nid addysg ffurfiol fel cyrsiau gradd neu hyfforddiant galwedigaethol)

• sefydlu grwpiau gyda sefydliadau eraill i gyd-ddysgu (magu rhwydweithiau a chymunedau)

• gweithio gyda rhywun sydd â phrofiad proffesiynol i ystyried pa gamau i’w cymryd nesaf wrth ddatblygu busnes eich sefydliad (mentora, hyfforddi)

• gwneud eich ymarfer yn fwy proffesiynol (cyngor am ddatblygu busnes, y cyfryngau cymdeithasol, cyngor marchnata)

• datblygu adnoddau neu offer ymarferol i broffesiynoli eich sefydliad (datblygu gwefan, deunyddiau marchnata, offer neu ddeunyddiau)

Byddai’n bosibl hefyd gynnwys cost:

• Cyflogau neu ffioedd am swyddi sy'n gysylltiedig yn uniongyrchol â threfnu neu ddatblygu busnes, sef rhai nad ydynt yn cael eu hariannu gan ffynonellau eraill. Rhaid cynnwys rhesymeg glir am pam mae'r swyddi’n hanfodol i'ch taith sefydliadol 

Rhaid i bawb dalu costau arferol y diwydiant o leiaf i weithwyr llawrydd. Os ydynt yn rhoi eu hamser mewn nwyddau, rhaid rhoi rhesymeg am hynny.

£500 hyd at £7,500 (gyda chostau hygyrchedd ar ben hynny)

Gwahoddir ceisiadau am dair lefel o arian:

Cyfnod Cynnar/Cyfnod Archwiliol (£500-£10,000)

Ail Gyfnod/Cyfnod Profi a Datblygu (£10,001-£50,000)

Trydydd Cyfnod/Datblygu Model Busnes Cynaliadwy (£50,001-£75,000)

Mae ceisiadau Cyfnod Cynnar/Cyfnod Archwiliol ar gyfer sefydliadau sy’n archwilio syniadau newydd neu ffyrdd newydd o weithio gan gynnwys y rhai sydd newydd gael eu ffurfio neu nad ydynt erioed wedi derbyn arian gennym. Mae'r cam yma’n gyfle gwych i brofi syniadau newydd a gweithio gyda phobl i fynd yn sefydliad mwy cynaliadwy. Bydd cael yr arian yma’n rhoi'r sail ichi ddatblygu eich sefydliad. 

Mae ceisiadau Ail Gam/Cyfnod Profi a Datblygu i sefydliadau sydd ymhellach ymlaen ar eu taith ddatblygu ac sydd â hanes mwy sefydledig neu sydd wedi llwyddo cyflawni prosiect Cam Cynnar/Cyfnod Archwiliol. Mae'r cam yma’n gyfle gwych i adeiladu ar y gwersi o gael arian gynt i gryfhau sail eich sefydliad a dod yn gadarnach fel sefydliad. Bydd cael yr arian yma’n cyfrannu'n sylweddol at ddatblygu busnes eich sefydliad a mynd â chi i’r lefel nesaf. 

Mae ceisiadau Trydydd Cyfnod/Datblygu Model Busnes Cynaliadwy i sefydliadau sydd â hanes hysbys o weithio ac sydd ar gam tyngedfennol ar eu taith ddatblygu neu sydd wedi llwyddo cyflawni Cam Cynnar/Archwiliol a phrosiect Ail Gam/Profi a Datblygu. Rhaid ichi ddangos eich bod wedi gweithredu ar y gwersi o’r arian gynt a sut rydych yn bwriadu defnyddio'r arian i fynd yn sefydliad mwy cynaliadwy. Rhaid dangos datblygu cysylltiadau a ffyrdd o weithio hirdymor hefyd. Mae'r cam yma’n gyfle gwych i sefydlu model busnes cynaliadwy, i ddod yn sefydliad gwytnach, i gynyddu eich sefydliad o bosibl ac i roi eich holl ddysgu blaenorol ar waith. Bydd cael yr arian yma’n cyfrannu'n sylweddol at gynaliadwyedd hirdymor eich sefydliad. 

Bydd ein staff yn gallu eich helpu i benderfynu faint i ymgeisio amdano. 

Bydd ymgeiswyr yn gallu gofyn am hyd at 90% o gost y prosiect. Dylai'r 10% sy'n weddill ddod oddi wrth ffynhonnell nad yw’n Gyngor Celfyddydau Cymru neu’r Loteri Genedlaethol. Bydd hyn yn gallu bod yn gymorth mewn nwyddau, arian neu'r ddau. Mae cymorth mewn nwyddau yn gallu bod yn gyfraniad nad yw'n arian fel stiwdio am ddim neu le i ymarfer am ddim neu rodd o offer neu amser rhywun. 

Rhaid i'ch sefydliad fod ar bwynt tyngedfennol yn ei daith. Os ydych yn y Cyfnod Cynnar, yr Ail Gam neu'r Trydydd Cyfnod, rydym yn disgwyl i'ch sefydliad fod yn barod i gymryd y camau priodol yn ei ddatblygiad hirdymor. Byddwn yn disgwyl i’r arian gyfrannu’n sylweddol at eich taith i’r lefel nesaf. 

Mae nodiadau cymorth am y gyllideb yma

12pm ar y dyddiadau canlynol fydd dyddiad cau ymgeisio:

Mercher 12 Mawrth 2025

Mercher 8 Hydref 2025

Rhaid gadael o leiaf 10 wythnos rhwng y dyddiad cau a dyddiad dechrau eich prosiect.

Nid oes modd inni ariannu prosiectau sydd eisoes wedi dechrau. Felly os bydd dyddiad dechrau eich cynnig yn dod cyn inni gael cyfle i asesu eich cais, bydd eich cais yn methu.

Am y pethau canlynol rydym yn chwilio mewn cais da:

Cyfnod Cynnar/Cyfnod Archwiliol 

• disgrifio’n glir ble rydych ar daith eich sefydliad a sut bydd yr arian yn eich helpu i gyrraedd eich nod 

• esbonio’n glir y rhwystrau rydych wedi'u hwynebu ar eich taith a sut bydd yr arian yn eich helpu i’w gwaredu

• esbonio’n glir pam mai nawr yw’r amser iawn ichi gael yr arian

• esbonio’n glir beth byddwch yn ei wneud â’r arian a pham mae’n bwysig i'ch sefydliad

• cynllun gweithredu/amserlen am y cam yma yn eich datblygiad 

• cyllideb glir sydd â'ch holl gostau cymwys 

Ail Gyfnod/Cyfnod Profi a Datblygu

Fel yr uchod a hefyd:

• tystiolaeth o'r galw am eich gwaith (fel cysylltu â'r gynulleidfa neu’r  gymuned/cyfranogwyr, clod beirniadol)

• dealltwriaeth ac esboniad clir o'r camau sydd eu hangen i wneud eich sefydliad yn fwy cynaliadwy a sut bydd yr arian yn eich helpu

Trydydd Cyfnod/Datblygu Model Busnes Cynaliadwy

Fel yr uchod i gyd a hefyd:
 

• disgrifio cyfleoedd i bartneriaethau hirdymor

• disgrifio unrhyw gyfleoedd i gynyddu eich sefydliad mewn ffordd briodol 

• dealltwriaeth ac esboniad clir o sut rydych yn anelu at fynd yn sefydliad cadarnach a gwytnach sy’n gallu ymgynnal yn y hirdymor 

Byddwn hefyd yn ystyried y ffactorau yma ar draws y tair lefel o arian:

• y potensial i'ch sefydliad gael effaith ehangach ar sector y celfyddydau

• lleoliad eich sefydliad

• yr effaith bosibl i’ch sefydliad ei chael ar eich celfyddyd 

• sut mae eich cynnig yn cyd-fynd â'n blaenoriaethau a'n hegwyddorion 

Gellir cyrchu ffurflen gais drwy Swyddog Datblygu Cyngor Celfyddydau Cymru unwaith y cytunir eich bod yn barod i gyflwyno cais.

Rhaid anfon atom ffurflen gais, cynnig a chyllideb.

Mae modd ichi gynnwys atodiadau hefyd i gefnogi eich cais. Cliciwch yma am ragor o wybodaeth. 

Mae’r templed am eich cyllideb yma

Mae’r canllawiau am sut i ysgrifennu eich cynnig yma

Mae’r nodiadau cymorth am y gyllideb yma

Mae'r enghraifft o'r ffurflen gais ar-lein yma

Mae'r enghraifft o'r Adroddiad Cwblhau yma

Rydym yn ceisio ein gorau glas i fod mor hyblyg â phosibl a rhoi cymorth ichi bob cam o'r ffordd. Byddwn yn cynnig arweiniad ichi am lunio eich syniadau a'ch cais i ddiwallu anghenion eich sefydliad. Bydd y cymorth yn dod gan un o’n Swyddogion Datblygu ac, os byddwch yn dewis un, gan eich Mentor.

Bydd y Swyddog yn:

• trafod eich syniadau a chadarnhau a ydy’ch sefydliad yn gymwys i ymgeisio i Gamau Creadigol ac, os felly, ar ba lefel. Bydd hefyd yn ateb eich cwestiynau am y gronfa a sut bydd yr arian yn cefnogi datblygiad eich sefydliad
• eich cysylltu ag un o'n Mentoriaid drwy ddangos rhestr o fentoriaid ichi ddewis un
• pwynt cyswllt yn y Cyngor os oes gennych chi, neu'ch Mentor, gwestiynau
• rhoi adborth am eich cais pan fyddwch chi a'ch Mentor yn barod i’w gyflwyno
• rhyddhau dolen i ffurflen gais pan gytunir bod eich cais yn barod i’w gyflwyno
• esbonio sut i ymgeisio mewn ffordd arall fel fideo os hoffech wneud hynny

Os byddwch yn dewis gweithio gyda Mentor, byddwn yn talu am hyd at 6 awr o'i amser. Mae’r mentoriaid yn dod o gefndiroedd gwahanol ac mae ganddynt ystod o brofiad byw a gweithio. Byddwn wedi’u hyfforddi i’ch mentora. Os oes angen rhagor na 6 awr arnoch, rhowch wybod inni. Byddwn yn gwneud ein gorau i sicrhau eich bod yn cael digon o amser gyda’ch Mentor.

Byddwn yn cynnig cymorth ac arweiniad ichi lunio cais sy'n canolbwyntio arnoch chi a’r camau nesaf ar eich taith sefydliadol

 Bydd y Mentor yn:

• rhoi arweiniad, cefnogaeth a gwybodaeth am eich syniadau cyn ichi ymgeisio
• rhoi rhestr o ymgynghorwyr gydag arbenigedd mewn sawl maes i’ch cefnogi ar eich taith neu bydd modd ichi gydweithio ag un arall o’ch dewis. Rhaid cynnwys ffi unrhyw un a fydd yn gweithio gyda chi yng nghost eich prosiect
• eich cefnogi i ddatblygu eich syniadau’n gynnig 
   

Meddyliwch am y cwestiynau: 

• Ble rydw i nawr? 

• Ble rydw i am fod? 

• Beth fydd rhaid imi ei gael i gyrraedd y nod? 

Yr atebion fydd yn sail i'ch cais.

Mae'r dewisiadau ar gael i bob un o'n tair lefel o arian.

Eich dewis chi yw cael Mentor ai peidio. 

Rydym yn sicrhau bod gwybodaeth ar gael mewn print bras, braille, sain, Hawdd ei Darllen ac Arwyddeg. Byddwn hefyd yn ceisio cynnig gwybodaeth mewn ieithoedd heblaw am y Gymraeg a'r Saesneg ar gais.

Os oes angen cymorth hygyrchedd arnoch, mae rhagor o wybodaeth a sut i’w drefnu yma

Os ydych yn penderfynu ymgeisio, y cam cyntaf yw siarad ag un o’n staff, fydd yn gwybod a yw’r cynllun yn iawn ichi ac a fydd yn diwallu eich anghenion. Os yw’n addas, byddwn yn eich cefnogi i ymgeisio.

Pan yn cysylltu â ni, darparwch yr wybodaeth ganlynol os gwelwch yn dda:

• Eich enw
• Ble rydych chi wedi eich lleoli
• Eich celfyddyd a gwybodaeth am eich practis artistig. Gallwch gynnwys unrhyw ddolenni i’ch gwaith neu eich gwefan (os oes gennych un)
• Trosolwg byr o’r rhwystrau dych chi wedi eu wynebu a sut rydych chi’n gymwys ar gyfer Camau Creadigol 

Dyma sut i gysylltu â ni:

E-bost – camaucreadigol@celf.cymru 

Ffôn - 03301 242733

Bydd un o'n staff yn cysylltu â chi yn eich dewis iaith. Rhaid cysylltu â'n staff cyn ymgeisio.

Cymhwysedd ar gyfer unigolion

Cymhwysedd ar gyfer sefydliadau

Nodiadau cymorth cyllid

Cymorth hygyrchedd

Dogfennau ategol

Diffiniadau o ffurfiau ar gelfyddyd

Y broses ymgeisio