Mae PWSH yn creu celf gyhoeddus radical a gorfoleddus yng Nghaerdydd sy’n dathlu gwahaniaeth ac yn ail-ddychmygu mannau cyhoeddus. Diolch i grant Creu gan Gyngor Celfyddydau Cymru, mae PWSH wedi creu murluniau newydd gydag artistiaid yng Nghaerdydd.
Mae pum gwaith celf cyhoeddus newydd wedi’u gosod yng Nghaffi Aubergine, Stryd Womanby, Marchnad Dan Do Caerdydd a murlun nad yw’n gyhoeddus yn Ysgol Uwchradd Llanisien. Cafodd artistiaid newydd PWSH eu curadu ar y cyd gan y Cyfarwyddwr Artistig Rachel Kinchin ochr yn ochr â charfan flaenorol PWSH. Roedd y rhestr hir yn cynnwys artistiaid a oedd wedi bod mewn cysylltiad â PWSH yn ogystal ag awgrymiadau gan artistiaid blaenorol.
Fe greodd Matt Joyce furlun ar Stryd Womanby (cefn Bar Revolution) ar themâu ymgolli ym myd natur, cariad at blanhigion, fforio, antur a hwyl. Darlunydd llawrydd sydd wedi’i leoli yng Nghaerdydd yw Matt ac mae ei ddarluniau yn cymysgu llinellau beiddgar a lliwiau llachar gyda hiwmor ac esthetig chwareus.
Mae Sahar Saki wedi bod yn cynrychioli ei gwaith ar ffurf gwaith celf murlun am yr ychydig flynyddoedd diwethaf mewn mannau cyhoeddus, a’r llynedd, fe gynhaliodd hi ŵyl furluniau er mwyn tynnu sylw at y mudiad ffeministaidd yn Iran. Mae ei murlun PWSH yn ddyluniad patrwm Persiaidd wedi’i ysbrydoli gan hen garpedi Persiaidd mewn lliwiau beiddgar cyfoes. Mae’r murlun i fyny'r grisiau ym Marchnad Dan Do Caerdydd.
Mae ei chelf yn croesawu'r ysbryd chwareus, ifanc sy'n byw ynom ni i gyd. Mae’r darn ‘Dream Bigger’ a greodd i PWSH i fyny’r grisiau ym Marchnad Dan Do Caerdydd ac mae’n troi o gwmpas bachgen ifanc yn trafod ffon dafl, gan ddwyn atgofion o amser pan nad oedd unrhyw gyfyngiadau ar freuddwydion. Mae’r artist hefyd yn taflu goleuni ar yr heriau a wynebir gan gymunedau ymylol, gan ein hatgoffa o arwyddocâd cydnabod a dathlu amrywiaeth.
Artist Cwiar ac abswrdydd o Gymru yw Hunk Williams y mae ei waith yn archwilio themâu diwylliant pop a gwrthddiwylliant. O ganlyniad i’w berthynas gymhleth gyda thyfu i fyny yn gwiar ac yn awtistig yn y Cymoedd, mae ei waith yn bwrw’n ôl i eiconau kitsch a camp o'r gorffennol ac yn aml yn defnyddio dychan wrth iddo wahodd y gwyliwr i ystyried "Ond beth mae'r cyfan yn ei olygu?". Mae murlun PWSH Hunk yn awdl i frwydrau hirfaith sydd bellach wedi'u goresgyn, undod, rhyddid a lwc dda.
Artist amlddisgyblaethol ar ddechrau ei gyrfa yw Ren Wolfe o Gaerdydd. Mae ei hymarfer yn archwilio sut y gallwn ddefnyddio chwarae a dychymyg i ddeall ni’n hunain, ein cymunedau, a'r byd o'n cwmpas. Mae darn Ren ar gyfer PWSH yn archwilio masgio, dychymyg, a’r berthynas rhwng amrywiaeth yn y byd naturiol a’r byd dynol hefyd. Mae murlun Ren yng Nghaffi Aubergine.
Bwriad Caffi Aubergine yw ailagor yn eu cartref newydd yng Nghanolfan Gymunedol Cathays ddydd Mercher 16 Awst - cadwch lygad ar eu cyfryngau cymdeithasol am gadarnhad o ddyddiadau ac amseroedd agor.
Ochr yn ochr â gosod y gwaith celf newydd, bu PWSH yn gweithio gyda dau fyfyriwr Byddar Safon Uwch Celf a Ffotograffiaeth a wnaeth cais i PWSH drwy Hear We Are ynghylch gwneud profiad gwaith. Hamzah Ahmed a Maisarah Bodor yw’r ddau fyfyriwr a gefnogodd artistiaid PWSH a’r tîm creadigol i osod y gweithiau celf drwy’r wythnos yn ogystal â dysgu am reoli prosiectau a churadu. Bu Matt Joyce hefyd yn gweithio gyda’r artist Nikolett Kovacs i greu murlun gyda’r bobl ifanc sy’n fyfyrwyr yn y Ganolfan Adnoddau ar gyfer Nam ar y Clyw yn Ysgol Uwchradd Llanisien.
Nod PWSH yw dathlu gwahaniaeth, cyfrannu at newid ac ail-ddychmygu mannau cyhoeddus - a chanolbwyntio ar gynhwysiant, tra’n creu mannau diogel i artistiaid a phobl greadigol. Mae PWSH yn brosiect celf gyhoeddus sy’n datblygu’n barhaus a ddaeth i’r amlwg gyntaf yng Nghanol Dinas Caerdydd ym mis Awst 2021 – a bellach mae wedi gweithio gyda 15 o artistiaid lleol.
“Es i ati i greu PWSH i alluogi mwy o gyfleoedd â thâl a chreu mannau cynhwysol a diogel i artistiaid wneud darnau gwaith cyhoeddus sy’n ymwneud â mwy na chael eu gweld yn unig. Mae PWSH yn ymwneud â chynhwysiant ystyrlon. Roeddwn i eisiau creu gwaith celf sy’n cyfrannu at wead ein dinas, boed hynny’n waliau mawr neu’n dyllau a chorneli. Mae cyd-guradu gydag artistiaid blaenorol PWSH yn teimlo fel ffordd gydweithredol ac ystyrlon o weithio er mwyn cynnwys a thalu ein hartistiaid PWSH blaenorol tra hefyd yn cael y cyfle i ymgysylltu â mwy o artistiaid.
Mae gweithio mewn partneriaeth â’r safleoedd iawn yn hanfodol – mae angen partneriaid arnom sy’n gwerthfawrogi bod angen i artistiaid a phobl greadigol gael eu talu am eu gwaith, a fydd yn creu prosiect dilys gyda ni ac yn gofalu am y gwaith celf. Nid yw PWSH yn ymwneud â brandio neu artistiaid sy’n ymateb i friff - mae'n ymwneud â’r artistiaid yn gwneud yr hyn y maen nhw wrth eu bodd yn ei wneud ac yn derbyn tâl amdano. Rydyn ni’n ceisio cymeradwyaeth ein safleoedd ar gyfer pob gwaith celf - mae'n bwysig eu bod yn dwlu arnynt.
Os hoffech chi gymryd rhan yn y dyfodol, gallwch gysylltu â ni drwy wefan PWSH os oes gennych chi gyllideb i ni greu gwaith sy’n cyd-fynd â’n hethos neu os hoffech chi gael eich cynnwys mewn cais am gyllid yn y dyfodol. Mae gen i gynlluniau mawr ar gyfer PWSH yn 2024 sy’n ymestyn y tu hwnt i furluniau ac i mewn i gelfyddyd a lles mewn mannau cyhoeddus.” Rachel Kinchin, Cyfarwyddwr Artistig.
"Mae Stryd Womanby bob amser wedi bod yn gartref i gelf fywiog yng Nghaerdydd. Pan welais yr holl waith gwych roedd tîm PWSH wedi'i wneud gyda gosodiadau blaenorol, roeddwn i'n gwybod bod ein hiet gefn fawr noeth yn Revolution yn galw allan am gael celf anhygoel arni hefyd! Diolch yn fawr i Rachel Kinchin a Matt Joyce am wneud i’r holl beth ddigwydd!" Matt Drew, Bar Revolution Caerdydd.
“Rydyn ni wrth ein bodd â gwaith Ren a Reg. Mae eu murluniau wedi gwneud i’r lle newydd deimlo fel cartref cyn i ni hyd yn oed orffen dadbacio. Roedden ni’n drist i orfod gadael ein murlun Aubergine mawr ar ôl yn yr hen adeilad ar Stryd Clare, felly mae wedi bod yn hwb mawr i forâl i weld celf newydd yn mynd ar y waliau. Diolch yn fawr iawn Rachel, Ren a Reg.” - Aarwn Brown, Caffi Aubergine.
Gellir gweld holl waith digidol PWSH nad yw’n barhaol ac nad yw ar gyfer y cyhoedd yma hefyd https://www.pwshcardiff.co.uk/locations
Nôl ym mis Mehefin 2023, comisiynwyd PWSH gan Music Theatre Wales i greu gwaith celf newydd mewn ymateb i operâu celf stryd - The Scorched Earth Trilogy. Mae Molly Sinclair-Thomson wedi creu murlun PWSH newydd yn Spit & Sawdust.
Meddai Molly am ei gwaith celf PWSH, “Roeddwn i eisiau cipio profiadau brwydrau byd natur oherwydd bod bodau dynol yn manteisio ar adnoddau’r ddaear. Y goleuadau llachar yn dal yr adar ac yn amharu ar fywyd gwyllt. Bodau dynol yn mentro ar dir sy'n perthyn i fodau eraill. Tra bo'r haul yn mynd yn boethach ac yn boethach, mae'r coed yn troi’n fatsis ac mae'r sêr yn pylu. Mae’r lliwiau llachar yn eich tynnu i mewn ond edrychwch yn agosach i ddod o hyd i’r stori.”
I ddysgu mwy am holl artistiaid a phrosiectau PWSH hyd yma, yn ogystal ag edrych ar fap PWSH sydd wedi'i ddiweddaru - https://www.pwshcardiff.co.uk/artists
Hoffai PWSH ddiolch i Gaffi Aubergine, Marchnad Dan Do Caerdydd, Bar Revolution ac Ysgol Uwchradd Llanisien am ddarparu mannau diogel i greu eu gwaith ac i Gyngor Celfyddydau Cymru am y cyllid i wneud iddo ddigwydd.