Cyhoeddi penodiad i rôl newydd, Cyfarwyddwr y Celfyddydau

Mae Catryn Ramasut yn arweinydd strategol ac yn ymarferydd cyfryngau entrepreneuraidd gyda dros 25 mlynedd o brofiad yn y diwydiannau creadigol a sefydliadau celfyddydol. Ganed Catryn yng Nghaerdydd ac mae’n siaradwraig Gymraeg o dreftadaeth gymysg. Mae ganddi bersbectif unigryw ar dirwedd ddiwylliannol Cymru.

Fel cyd-sylfaenydd a Rheolwr Gyfarwyddwr ‘Cynhyrchiadau ie ie’, mae Catryn wedi ennill gwobrau am ei gwaith sy’n cyfuno ffurfiau celfyddydol amrywiol ac sy’n dangos diwylliant Cymreig i’r byd. Ymysg ei ffilmiau mae “Separado!”, “Rockfield: The Studio on the Farm”, a “Black and Welsh".

Catryn yw Cadeirydd presennol Cymru Greadigol, mae’n aelod o fwrdd Canolfan Celfyddydau Chapter, a hi sy’n cynrychioli Cymru ar Gyngor Diwydiannau Creadigol DCMS. Drwy ymgymryd â’r swyddi yma, mae wedi dangos ei gallu i ddarparu cyfeiriad strategol, i feithrin twf yn y diwydiannau creadigol, ac i hyrwyddo amrywiaeth a chynhwysiant.

Mae’n ymroddedig i adfywio’r sector celfyddydol, ac yn ymdrechu i gyfuno sensitifrwydd diwylliannol, arloesedd strategol ac arweinyddiaeth, i lunio gweledigaeth flaengar ar gyfer y celfyddydau yng Nghymru; un sy'n cofleidio amrywiaeth ac yn meithrin creadigrwydd ar draws y genedl.

Dywedodd Dafydd Rhys, Prif Weithredwr Cyngor Celfyddydau Cymru:

“Daw Catryn â phrofiad helaeth iawn o’r sector gelfyddydol yn ogystal â’r diwydiannau creadigol ac bydd ei hegni a’i ymroddiad i greadigrwydd a gwasanaethu cymunedau amrywiol Cymru yn gaffaeliad mawr i Gyngor Celfyddydau Cymru.

Mae hi'n rheolwr profiadol ac wedi eistedd ar fwrdd Chapter yng Nghaerdydd ers sawl blwyddyn bellach, a hi yw Cadeirydd Gymru Greadigol, corff sydd wedi datblygu'r sector diwydiannau creadigol yng Nghymru.

Mewn cyfnod llawn heriau fe fydd syniadau ac egwyddorion craidd Catryn, yn ogystal â’i gweledigaeth bellgyrhaeddol yn sicrhau arweiniad cadarn ac anturus i’r celfyddydau yng Nghymru.”

Dywedodd Catryn Ramasut:

"Rwyf wedi gwirioni mod i’n gallu mynd i’r afael â'r her newydd hon fel Cyfarwyddwr y Celfyddydau i Gyngor Celfyddydau Cymru. Mae ysbryd creadigol Cymru i’w weld ym mhobman, ac rwy'n awyddus i ffrwyno pŵer ein treftadaeth ddiwylliannol gyfoethog wrth wthio ffiniau a chroesawu lleisiau newydd. O fy mhrofiadau mewn cynhyrchu ffilm a hyrwyddo amrywiaeth yn y diwydiannau creadigol, rwyf wedi gweld drosof fy hun effaith drawsnewidiol y celfyddydau. Nawr, mae'n bryd ail-ddychmygu'r hyn y gall y celfyddydau ei wneud i Gymru. Gadewch i ni wau gyd-blethu ein dawn greadigol gan wneud y celfyddydau yn hygyrch i bawb, gwella llesiant pobl ar draws ein cymunedau, ac hefyd, rhoi talent Cymreig ar lwyfan byd-eang. Gyda’n gilydd, gallwn greu dyfodol bywiog, cynhwysol i gelfyddydau Cymru, un sy’n wirioneddol adlewyrchu pob un ohonom ym mhob rhan o Gymru, ac sy’n cyfrannu at wlad gynaliadwy, lewyrchus.”