O 75 i dros 480 o bartneriaid creadigol, mae Am wedi trawsnewid y ffordd y mae pobl yn darganfod celfyddydau Cymru ar-lein. Nawr, i nodi ei bumed pen-blwydd, mae'n ail-lansio ei wefan ac yn lansio ei ŵyl ffilm ddigidol gyntaf erioed: AmCam.
Am yw'r platfform cyntaf o'i fath – gofod digidol dwyieithog, mynediad agored ar gyfer archwilio cyfoeth diwylliant Cymru, o gerddoriaeth a theatr i ffilm, celf a llenyddiaeth. Wedi'i lansio yn 2020 gyda dim ond 75 o bartneriaid creadigol, mae bellach yn gartref i fwy na 480 o sefydliadau ac 8,000 o ddarnau o gynnwys, gan ei wneud yn fan hanfodol ar gyfer creadigrwydd, cysylltiad a chydweithio.
Ers y diwrnod cyntaf, mae Am wedi aros yn driw i'w genhadaeth: adlewyrchu amrywiaeth, arloesedd a chynhwysiant Cymru fodern. Mae hyn yn cynnwys partneriaeth nodedig â Chelfyddydau Anabledd Cymru yn 2022 i helpu i gael gwared ar rwystrau i greadigwyr byddar ac anabl.
I ddathlu pum mlynedd, mae Am yn lansio AmCam – gŵyl ffilm ddigidol newydd sy’n taflu goleuni ar greadigrwydd a gwydnwch mewn cymunedau ledled Cymru. Bydd pedair ffilm fer newydd yn cael eu dangos am y tro cyntaf ar 18 Mehefin, i gyd-fynd â lansio gwefan newydd Am, a adeiladwyd i wella hygyrchedd a phrofiad y defnyddiwr.
Mae’r ffilmiau dan sylw yn cynnwys:
- Pwy Ydw i Heddiw, gan Ffion Pritchard, yn archwilio grymuso menywod ym Mangor
- Village Artists, gan Jon Berg, portread o fywyd creadigol yng Nghwmllynfell
- Ffenestri Mewnol / Interior Windows, gan Harriet Fleuriot, yn cipio myfyrdodau gan fenywod hŷn yn y Rhondda
- The Willow Collective, Mairéad Ruane, yn dilyn cymuned greadigol dan arweiniad niwroamrywiol yn y Rhyl
Cefnogir yr ŵyl a’r ail-lansio gan Gyngor Celfyddydau Cymru.
Dywedodd y Gweinidog Diwylliant, Jack Sargeant: “Hoffwn longyfarch tîm Am ar y garreg filltir drawiadol hon. Bum mlynedd yn ôl, gofynnwyd i Gymru Greadigol gefnogi cysyniad newydd, unigryw er budd y diwydiannau creadigol, ac rwy’n gyffrous i weld y ffyrdd arloesol y mae wedi tyfu a gwella’n barhaus i ddod yr Am ddeinamig, hygyrch a hynod werthfawr ydyw heddiw. Heb sôn am y manteision y mae’r platfform yn eu cynnig i greadigwyr Cymru o ran ei botensial ar gyfer cydweithio a darganfod. Penblwydd hapus, Am!”
Dywedodd Dafydd Rhys, Prif Weithredwr Cyngor Celfyddydau Cymru:
“Mae Am wedi tyfu o’r gwaelod i fyny, a gwelodd llawer ohonom yn uniongyrchol pa mor hanfodol y daeth yn ystod y pandemig. Mae wedi mynd o nerth i nerth, a byddwn yn annog pawb i archwilio ambobdim.cymru a darganfod sut olwg sydd ar greadigrwydd Cymru heddiw.”
Gan edrych ymlaen, mae Am yn canolbwyntio ar gynyddu ei gyrhaeddiad a'i effaith – adeiladu partneriaethau newydd, cefnogi artistiaid ar bob lefel, a dangos beth all platfform diwylliannol cenedlaethol yng Nghymru fod mewn gwirionedd.
Dywedodd Alun Llwyd, Prif Weithredwr Am:
“Gwnaed Am yng Nghymru ar gyfer unrhyw un, unrhyw le sydd eisiau cysylltu â diwylliant Cymru. Rydym bob amser wedi anelu at adeiladu platfform sy'n agored i bawb – beth bynnag fo'ch oedran, hunaniaeth neu iaith. Rydym yn falch o'r hyn rydym wedi'i adeiladu, ac yn gyffrous am yr hyn sydd nesaf.”
Dysgwch fwy am Am, y wefan newydd a gŵyl AmCam yn ambobdim.cymru.